5. bekkur
Þeir sem eru jákvæðir eru frábærir!

Skólinn hófst að nýju föstudaginn 17. febrúar eftir fjögurra daga vetrarfrí. Krakkarnir höfðu frá ýmsu að segja og greinilegt að allir upplifðu eitthvað nýtt. Sumir fóru í ferðir og margir voru í smá vinnu við að passa systkini sín.

Kennarinn nýtti vetrarfríið til að fara til Glasgow með starfsfólki Flúðaskóla og Leikskólanum. Þar var margt að sjá og nokkrar hugmyndir komu í kollinn, sem eflaust verða nýttar í skólastarfinu hér heima. Bekkurinn fékk myndasýningu í vikunni og heilmikil umræða skapaðist í kringum hana, m.a. skólabúningamál …..og fl.

Við erum nú farin af stað með landafræðina og nú erum við að læra um Vesturland. Við erum svo heppin að nokkrir krakkar hafa farið um Vesturland og einn okkar á heilmikla ættarflóru þar svo það er frá ýmsu að segja og lýsingarnar og tengingarnar verða meiri og nákvæmari þegar svo er.

Öskudagurinn var virkilega vel heppnaður og hátíðin í félagsheimilinu stórgóð, þökk sé foreldrafélaginu. Allir voru duglegir að mæta í búningum og tók þátt í deginum á skemmtilegan hátt. Ekki spillti það nú gleðinni á Batrek okkar fékk verðlaun fyrir skemmtilegasta búninginn.

Miðstigið skrapp í gönguferð í tilefni af Lífshlaupinu sem nú er í gangi á Íslandi. Við gegnum upp á Högnastaðaás og virtum fjallahringinn fyrir okkur. Skyggnið var ágætt en vonandi gefst okkur tækifæri til að fara einhvern tímann seinna í vor og spá enn betur í fjöllin. Við fórum svo litinn hring yfir ásinn og komum niður hjá Hvammi. Fín gönguferð sem reyndi meira að segja pínulítið á áræðnina…

Nú er vetrarfrí að skella á og nemendur mæta ekki í skólann aftur fyrr en föstudaginn 17. febrúar.

Vikan hefur gegnið vel og nemendur hafa unnið ágætlega. Við erum farin af stað með landafræðina og nú er það Ísland sem liggur undir. Í vikunni vorum við aðallega í upprifjun á ýmis konar kortalestri og var greinilegt að krakkarnir muna vel efnið frá í fyrra varðandi hann. Við lærðum um örnefni og rifjuðum upp ýmis heiti á fjöllum, vötnum, hellum, hraunum, söndum, fossum og svo framvegis. Við tökum svo hvern landshlutann á fætur öðrum og kynnust stöðum og landslagi.

Í stærðfræðinni erum við komin vel á veg  með síðasta kaflann í Stiku 1a. Hann er afar myndrænn kafli enda fjallar hann um ýmis konar form. Krakkarnir spreyta sig á kínverska púslinu Tangram og fleiru til.

Ég hef verið að sýna krökkunum nokkur af þeim prófum sem þeir hafa tekið undanfarið og sum þeirra höfum við farið vel í gegnum til að átta okkur á hvar okkar sterku hliðar og veiku hliðar liggja. Almennt gengu prófin bara vel og niðurstöður verða birtar öllum þegar námsmatið liggur fyrir sem er fljótlega eftir vetrarfrí.

Með von um góða og skemmtilega daga framundan.

Kveðja

Guðbjörg Viðarsd.

Vikan þotin eins og aðrar. Í dag hélum við þorrablót á miðstigi. Við hittumst í matsalnum  og allir bekkir lögðu fram atriði. 7. bekkur varmeð upplestur um eitt og annað varðandi þann mat sem var á boðunum.  6. bekkur fræddi okkur um gamla mánaðarheitið Þorrann, ýmsar venjur varðandi matinn og fl. Stelpur og strákar í 7. bekk voru svo með “ MINNI, karla og kvenna“  þar sem dregið var fram margt krúttlegt um hitt kynið þótt augljóst væri nú að ekki
væri hitt kynið…… FULLKOMIÐ!  Okkar framlag til skemmtunar var kvikmynd um kristinitökuna á Íslandi sem við erum
nýbúin að taka upp í stofunni okkar. Myndin tókst vel og var bara þrælskemmtileg (hvernig sem svo dráp og þvinganir geta verið skemmtilegar áhorfs!!!).  Stákarnir sungu svo fyrir stelpurnar og stelpurnar fyrir strákana. Aldeilis flott! Svo má nú ekki gleyma að minnast á allan þorramatinn sem rann  bara ljúflega niður um munn og maga. Krakkarnir voru búnir að undirbúa matinn í
heimilisfræðinni, smyrja flatkökur, baka kleinur, rífa harðfiskinn  og skera allt gumsi, súrt og ósúrt, í litla teninga.

Í vikunni erum við búin að taka bæði miðsvetrarpróf í stærðfræði og könnun í stafsetningu. Krakkarnir voru búnir að læra vel fyrir stærðfræðina en stafsetningin var óvænt og enginn lærði sérstaklega fyrir hana.

Nemendaviðtöl standa yfir og er það von umsjónarkennarans að þau klárist í næstu viku. Í viðtölunum sest umsjónarkennari niður með hverjum og einum nemanda og fer yfir stöðu mála varðandi líðan og samskipti. Alltaf skila viðtölin einhverju sem þarf að taka upp og vinna með, ýmist stór eða smá mál en alltaf vonandi til hins betra fyrir okkur öll.

Enn einn veðurdagurinn í dag. Lítið um kennslu, það verður að hafa það. Vonandi er þessi veðuróvissa yfirstaðin og allt fari nú að fara í öruggan farveg. Þessa dagana eru ýmis próf  í gangi. Flestir eru búnir að taka lestrarpróf og allir reyndu sitt besta í móðurmálsprófinu í gær. Lesskilningsverkefni og stafsetning verður tekin eftir hendinni en á þriðjudaginn næsta verður próf í stærðfræði. Gátlisti og upprifjunarhefti fer heim með heimanáminu sem fer vonandi heim á morgun úr því það klikkaði í dag.

Á þriðjudaginn kom Ólafur Oddur Sigurðsson í heimsókn í skólann. Hann er glímufrömuður og hetja á þeim vettvangi. Hann kynnti fyrir okkur glímuna og allir fengu að prófa.

Skoðið endilega krækjuna hér til hliðar þar sem stendur myndir. Þar eru fleiri myndir af glímunni og öðrum viðburðum.

Eitt og annað gerðist nú markvert þessa vikuna sem endra nær.

Guðný hjúkka kom í heimsókn og spjallaði við okkur um hreyfingu og mataræði. Hún sýndi okkur ýmsar myndir og talaði um mikilvægi þess að vera holl í matarvali og borða nokkrum sinnum yfir daginn. Hún talaði um hve gott væri fyrir okkur að hreyfa okkur mikið þá liði okkur betur bæði andlega og líkamlega.

Í samfélagsfræðinni erum við að ljúka við víkingabækurnar og nú erum við að spjalla um fræga fornkappa á Íslandi og þann viðburð þegar kristni var lögtekinn á alþingi á Þingvöllum. Við erum byrjuð að lesa leikrit um þann atburð sem annað hvort verður tekið upp á vídio eða flutt beint…….

Nokkarar kannanir standa fyrir dyrum. Í móðurmáli og stærðfræði  æfa krakkarnir sig sérstaklega fyrir kannanirnar (heimavinnan sem fór heim í gær miðaðist við það sem kunna þarf í móðurmáli) og í stærðfræðinni tökum við könnun úr því efni sem við erum búin að vera að vinna í undanfarið. Svo er lestar, skriftar og ritunarpróf sem tekin eru eftir hendinni.

Ég læt svo fylgja mynd af verkefni sem krakkarnir unnu fyrir jólin í verkgreinunum. Betlemshúsið og fæðing Jesú.

Gleðilegt ár og takk fyrir það gamla!

Við erum öll byrjuð af krafti enda liðnar nærri tvær skólavikur frá áramótum. Einhver álög eru reyndar á föstudögunum en þeir hafa báðir verið undarlegir til kennslu. Það hefur verið svo mikil hálka að ekki hefur verið þorandi að keyra skólabílana um sveitina.  Skólinn var samt opinn og kennsla fyrir þá sem hafa komist.

Föstudaginn 6. Jan. æ tlaði allur skólinn að kveðja  jólin í skóginum með ljósahátíð og áramótalögum en það féll því miður niður vegna hálkunnar. Bekkurinn okkar fer þó eflaust næstu daga með vasaljós út í skóg til að leika okkur og upplifa myrkrið og leita okkur ýmissa upplýsinga…….. nánari fréttir af því síðar.

Víkingabækur eru að myndast í skólastofunni en við byrjuðum á þeim fyrir jól og erum komin langt. Þetta eru myndasögubækur sem gerast í kringum 1000 og eru um fólk sem þurfti að flytja burt og leita að nýju landi. Fólkið fór á opnum skipum yfir hafið og gengur misvel í lífinu.

Í íslenskunni er lesskilningurinn á oddinum og við beitum ýmsum aðferðum til að skilja textann betur. T.d. búum við til spurningar, beitum forspám með því að skoða myndir, fyrirsagnir eða lesum lítinn bút í einu. Við endursegjum líka efnið og reynum þannig að festa textann í minninu. Þetta ferli samþættum við kristin fræði og samfélagsfræði.

Í kristin fræðinni erum við í siðfræði og höfum unnið með „klípusögur“ sem eru stuttar sögur sem vel geta gerst í okkar daglega lífi. Við höfum fallað um ótta og reynt að leita ráða meðal nemenda hvernig má þjálfa sig að vinna bug á ýmsum ótta. Við komumst að því að sumt er auðvelt að vinna á en öðru getum við ekki stjórnað og verðum að lifa við það. Við höfum líka fjallað um fyrir bærið „ hver er mestur“  og spurt okkur hvort að það sé endilega sá sem er bestur í einhverju t.d. íþróttum eða öðru. Stundum getur sá verið mestur sem ber mestu umhyggjuna fyrir náunganum og lætur öðrum líða eins og þeir séu þeir séu virkilega flottir.

Í stærðfræðinni erum við að vinna með tugbrot, þar vitnum við m.a. í heimilisfræðina og fengum mörg ílát lánuð þar til að pæla saman í lítrum, desilítrum og fleira. Hvað er t.d. 1 dl. stór hluti af einum lítra?

Meira seinna……..

Þá er bara komið jólafrí! Gaman gaman. Litlu jólin afstaðin og nú tókst leikritið okkar virkilega vel. Krakkarnir stóðu sig mjög vel og er upprennandi leikarar sem gætu svo vel staðið á sviði Þjóðleikhússins. Kíkið á myndirnar hér til hliðar. Við áttum svo notalega stund í bekkjarstofunni okkar þar sem ég (Guðbjörg) las sögu og allir hlustuðu mjög vel. ALlir fengu svo fallega kveðju frá bekkjarfélögunum sínum og að sjálfsögðu var pakkaruglið á sínum stað.

Ég óska öllum gleðilegra jóla og farsældar á nýju ári. Takk fyrir gott samstarf og sjáumst hress á nýju ári.

Bestu jólakveðjur

Guðbjörg Viðarsd.

Nú er aldeilis gangur í leikritinu okkar  og allt farið að rúlla vel. Við minnum á Generalprufu á mánudaginn kl 9:00 í Félagsheimilinu þar sem allir eru velkomnir, ömmur, afar, mömmur, pabbar og aðrir velunnarar.

Eittvað vantar upp á búninga svo endilega kíkið á tölvupóstinn varðandi það.

Foreldratenglarnir stóðu fyrir bekkjarkvöldi í vikunni þar sem piparkökur og annað góðgæti rann ljúflega niður. Krakkarnir sigruðu aftur þá fullorðnu í Partý-alias, munaði samt ekki miklu núna….sumir ótrúlegar flinkir að giska á rétt svar en líklega átti Marín þó metið þegar hún giskaði á þriggja blaða smára, öllum að óvörum….og fékk rétt!

Á mánudaginn mega krakkarnir hafa með sér smákökur í nesti.

Desember er heldur betur kominn og undirbúningur fyrir litlu jólin hafinn. 5. bekkur verður með leikrit á litlu jólunum og við erum byrjuð að æfa það. Allir fengu handrit heim og þurfa að lesa sitt. Varðandi búninga þá hafði ég hugsað mér að allir væru með rauða jólasveinahúfu og annað hvort rauðum fötum eða loðapeysu. Gott ef allir geta hjálpast að við að finna búning.

Við fórum í sleðaferð í dag, allt miðstigið og það mátti sko aldeilis sjá tilþrif í brekkunni.