5. bekkur
Þeir sem eru jákvæðir eru frábærir!

Vikan þotin eins og aðrar. Í dag hélum við þorrablót á miðstigi. Við hittumst í matsalnum  og allir bekkir lögðu fram atriði. 7. bekkur varmeð upplestur um eitt og annað varðandi þann mat sem var á boðunum.  6. bekkur fræddi okkur um gamla mánaðarheitið Þorrann, ýmsar venjur varðandi matinn og fl. Stelpur og strákar í 7. bekk voru svo með “ MINNI, karla og kvenna“  þar sem dregið var fram margt krúttlegt um hitt kynið þótt augljóst væri nú að ekki
væri hitt kynið…… FULLKOMIÐ!  Okkar framlag til skemmtunar var kvikmynd um kristinitökuna á Íslandi sem við erum
nýbúin að taka upp í stofunni okkar. Myndin tókst vel og var bara þrælskemmtileg (hvernig sem svo dráp og þvinganir geta verið skemmtilegar áhorfs!!!).  Stákarnir sungu svo fyrir stelpurnar og stelpurnar fyrir strákana. Aldeilis flott! Svo má nú ekki gleyma að minnast á allan þorramatinn sem rann  bara ljúflega niður um munn og maga. Krakkarnir voru búnir að undirbúa matinn í
heimilisfræðinni, smyrja flatkökur, baka kleinur, rífa harðfiskinn  og skera allt gumsi, súrt og ósúrt, í litla teninga.

Í vikunni erum við búin að taka bæði miðsvetrarpróf í stærðfræði og könnun í stafsetningu. Krakkarnir voru búnir að læra vel fyrir stærðfræðina en stafsetningin var óvænt og enginn lærði sérstaklega fyrir hana.

Nemendaviðtöl standa yfir og er það von umsjónarkennarans að þau klárist í næstu viku. Í viðtölunum sest umsjónarkennari niður með hverjum og einum nemanda og fer yfir stöðu mála varðandi líðan og samskipti. Alltaf skila viðtölin einhverju sem þarf að taka upp og vinna með, ýmist stór eða smá mál en alltaf vonandi til hins betra fyrir okkur öll.

Enn einn veðurdagurinn í dag. Lítið um kennslu, það verður að hafa það. Vonandi er þessi veðuróvissa yfirstaðin og allt fari nú að fara í öruggan farveg. Þessa dagana eru ýmis próf  í gangi. Flestir eru búnir að taka lestrarpróf og allir reyndu sitt besta í móðurmálsprófinu í gær. Lesskilningsverkefni og stafsetning verður tekin eftir hendinni en á þriðjudaginn næsta verður próf í stærðfræði. Gátlisti og upprifjunarhefti fer heim með heimanáminu sem fer vonandi heim á morgun úr því það klikkaði í dag.

Á þriðjudaginn kom Ólafur Oddur Sigurðsson í heimsókn í skólann. Hann er glímufrömuður og hetja á þeim vettvangi. Hann kynnti fyrir okkur glímuna og allir fengu að prófa.

Skoðið endilega krækjuna hér til hliðar þar sem stendur myndir. Þar eru fleiri myndir af glímunni og öðrum viðburðum.

Eitt og annað gerðist nú markvert þessa vikuna sem endra nær.

Guðný hjúkka kom í heimsókn og spjallaði við okkur um hreyfingu og mataræði. Hún sýndi okkur ýmsar myndir og talaði um mikilvægi þess að vera holl í matarvali og borða nokkrum sinnum yfir daginn. Hún talaði um hve gott væri fyrir okkur að hreyfa okkur mikið þá liði okkur betur bæði andlega og líkamlega.

Í samfélagsfræðinni erum við að ljúka við víkingabækurnar og nú erum við að spjalla um fræga fornkappa á Íslandi og þann viðburð þegar kristni var lögtekinn á alþingi á Þingvöllum. Við erum byrjuð að lesa leikrit um þann atburð sem annað hvort verður tekið upp á vídio eða flutt beint…….

Nokkarar kannanir standa fyrir dyrum. Í móðurmáli og stærðfræði  æfa krakkarnir sig sérstaklega fyrir kannanirnar (heimavinnan sem fór heim í gær miðaðist við það sem kunna þarf í móðurmáli) og í stærðfræðinni tökum við könnun úr því efni sem við erum búin að vera að vinna í undanfarið. Svo er lestar, skriftar og ritunarpróf sem tekin eru eftir hendinni.

Ég læt svo fylgja mynd af verkefni sem krakkarnir unnu fyrir jólin í verkgreinunum. Betlemshúsið og fæðing Jesú.

Gleðilegt ár og takk fyrir það gamla!

Við erum öll byrjuð af krafti enda liðnar nærri tvær skólavikur frá áramótum. Einhver álög eru reyndar á föstudögunum en þeir hafa báðir verið undarlegir til kennslu. Það hefur verið svo mikil hálka að ekki hefur verið þorandi að keyra skólabílana um sveitina.  Skólinn var samt opinn og kennsla fyrir þá sem hafa komist.

Föstudaginn 6. Jan. æ tlaði allur skólinn að kveðja  jólin í skóginum með ljósahátíð og áramótalögum en það féll því miður niður vegna hálkunnar. Bekkurinn okkar fer þó eflaust næstu daga með vasaljós út í skóg til að leika okkur og upplifa myrkrið og leita okkur ýmissa upplýsinga…….. nánari fréttir af því síðar.

Víkingabækur eru að myndast í skólastofunni en við byrjuðum á þeim fyrir jól og erum komin langt. Þetta eru myndasögubækur sem gerast í kringum 1000 og eru um fólk sem þurfti að flytja burt og leita að nýju landi. Fólkið fór á opnum skipum yfir hafið og gengur misvel í lífinu.

Í íslenskunni er lesskilningurinn á oddinum og við beitum ýmsum aðferðum til að skilja textann betur. T.d. búum við til spurningar, beitum forspám með því að skoða myndir, fyrirsagnir eða lesum lítinn bút í einu. Við endursegjum líka efnið og reynum þannig að festa textann í minninu. Þetta ferli samþættum við kristin fræði og samfélagsfræði.

Í kristin fræðinni erum við í siðfræði og höfum unnið með „klípusögur“ sem eru stuttar sögur sem vel geta gerst í okkar daglega lífi. Við höfum fallað um ótta og reynt að leita ráða meðal nemenda hvernig má þjálfa sig að vinna bug á ýmsum ótta. Við komumst að því að sumt er auðvelt að vinna á en öðru getum við ekki stjórnað og verðum að lifa við það. Við höfum líka fjallað um fyrir bærið „ hver er mestur“  og spurt okkur hvort að það sé endilega sá sem er bestur í einhverju t.d. íþróttum eða öðru. Stundum getur sá verið mestur sem ber mestu umhyggjuna fyrir náunganum og lætur öðrum líða eins og þeir séu þeir séu virkilega flottir.

Í stærðfræðinni erum við að vinna með tugbrot, þar vitnum við m.a. í heimilisfræðina og fengum mörg ílát lánuð þar til að pæla saman í lítrum, desilítrum og fleira. Hvað er t.d. 1 dl. stór hluti af einum lítra?

Meira seinna……..

Þá er bara komið jólafrí! Gaman gaman. Litlu jólin afstaðin og nú tókst leikritið okkar virkilega vel. Krakkarnir stóðu sig mjög vel og er upprennandi leikarar sem gætu svo vel staðið á sviði Þjóðleikhússins. Kíkið á myndirnar hér til hliðar. Við áttum svo notalega stund í bekkjarstofunni okkar þar sem ég (Guðbjörg) las sögu og allir hlustuðu mjög vel. ALlir fengu svo fallega kveðju frá bekkjarfélögunum sínum og að sjálfsögðu var pakkaruglið á sínum stað.

Ég óska öllum gleðilegra jóla og farsældar á nýju ári. Takk fyrir gott samstarf og sjáumst hress á nýju ári.

Bestu jólakveðjur

Guðbjörg Viðarsd.

Nú er aldeilis gangur í leikritinu okkar  og allt farið að rúlla vel. Við minnum á Generalprufu á mánudaginn kl 9:00 í Félagsheimilinu þar sem allir eru velkomnir, ömmur, afar, mömmur, pabbar og aðrir velunnarar.

Eittvað vantar upp á búninga svo endilega kíkið á tölvupóstinn varðandi það.

Foreldratenglarnir stóðu fyrir bekkjarkvöldi í vikunni þar sem piparkökur og annað góðgæti rann ljúflega niður. Krakkarnir sigruðu aftur þá fullorðnu í Partý-alias, munaði samt ekki miklu núna….sumir ótrúlegar flinkir að giska á rétt svar en líklega átti Marín þó metið þegar hún giskaði á þriggja blaða smára, öllum að óvörum….og fékk rétt!

Á mánudaginn mega krakkarnir hafa með sér smákökur í nesti.

Desember er heldur betur kominn og undirbúningur fyrir litlu jólin hafinn. 5. bekkur verður með leikrit á litlu jólunum og við erum byrjuð að æfa það. Allir fengu handrit heim og þurfa að lesa sitt. Varðandi búninga þá hafði ég hugsað mér að allir væru með rauða jólasveinahúfu og annað hvort rauðum fötum eða loðapeysu. Gott ef allir geta hjálpast að við að finna búning.

Við fórum í sleðaferð í dag, allt miðstigið og það mátti sko aldeilis sjá tilþrif í brekkunni.

Nú er tíminn fyrir jólaljósin enda aðventan gegnin í garð. Við erum búin að skreyta svolítið í stofunni okkar, bæði í gluggum og einnig erum við búin að hengja fínheit í loftið. Krakkarnir eru alltaf til í meira (og kannski kennarinn líka) svo eitthvað á eflaust eftir að bætast við. Endilega veitið gluggunum okkar eftirtekt ef þið eigið leið framhjá skólanum. Við erum ánægð með þá.

Í trúarbragðafræðinni lásum við um síðustu skref Ísraelsmanna inn til fyrirheitna landsins. Hvernig þeim tókst að vinna Jeríkó og lýsinguna á gæðum landsins. Hinni löngu ferð Ísraelsmanna er því lokið og þeir loks komnir yfir þrældóm og hungursneyðir.

Í samfélagsfræðinni erum við að fjalla um víkingatímann og nemendur eru að búa til sögu um víkingafjölskyldu sem flytur frá Noregi til nýs lands. Sagan verður svo sett í litla bók sem verður myndskreytt með tölvuskrifuðum texta.

Við fylgjum áætlun í stærðfræðinni og hafa nemendur hamast við undanfarna stærðfræðitíma til að klára sem mest af áætluninni. Einhverir tóku bækurnar með heim til að klára um helgina.

Allir nemendur komu saman á sal í gær, 1. des., en þá var einnig dagur tónlistar. Margar útvarpsrásir útvörpuðu nokkrum lögum á sama tíma og tóku nemendur þátt með því að taka undir með útvarpinu.

Enn er kominn föstudagur og nú bara snjór og pínu kuldi en það er bara skemmtilegt og margir hafa verið duglegir að leika úti í snjónum. Í skólanum er ákveðið svæði þar sem leyfilegt er að fara í snjóstríð og þeir sem hafa áhuga á því fara á það svæði en þeir sem forðast þann leik halda sér fjærri. 5. bekk gengur vel að virða þetta skipulag, að því er ég best veit, og það er gott.

Nú eru annarskil og námsmatið fór heim í gær. Að því tilefni var svolítið uppbrot hjá okkur í 5. bekk í dag og við horfðum á DVD-mynd um Ástrík og Kleópötru. Myndin fellur vel við námsefnið okkar í samfélagsfræðinni þar sem rómverjar og egyptar koma mikið við sögu.  Það heyrðist nú eitthvað fuss í bekknum yfir myndavalinu  en á endandum held ég að allir hafi verið sáttir við myndina.

Við unnum eins og vanalega eitt og annað í hinum ýmsu námsgreinum. M.a. unnum við með fyrirgefningu, bæði gagnvart örðum og sjálfum okkur í trúarbragðafræðinni. Við lásum sögur þar sem ýmis ljót orð voru látin falla um náungann og svo þurftum við að hjálpast að að leysa málin, koma með hugmyndir og finna lausnir á vanamálunum sem voru í sögunum.

Námsmatið er heill hellingur af blöðum sem nauðsynlegt er að setjast yfir (foreldri og barn). Annað heimanám fór ekki heim þessa vikuna enda mikið að lesa.

Brunaæfing fór fam í dag föstudag. Þá þurftu allir að fara stystu leið út úr skólabyggingunni.  5.bekkur var í Bolafæti svo við hoppuðum út um gluggann og söfuðumst  svo saman á planinu fyrir utan íþróttahúsið.

Dagur íslenskrar tungu var heldur betur haldinn hátíðlegur í vikunni. Krakkarnir stóðu sig frábærlega
og foreldrar og annað venslafólk duglegt að koma. Takk kærlega fyrir það!
Skólinn iðaði af lífi þennan dag. Kórar sungu, upplestur var hér og þar,
vöfflur til sölu og ýmis atriði voru í bekkjarstofunum. 5. bekkingarnir voru með þrjú atriði. Fyrst
var glærusýning frá menninga- og skemmtiferðinni til Reykjavíkur í haust.
Nemendur sýndu myndir á skjá og töluðu undir. Næsta atriði var ljóðalestur þar
sem nemendur fluttu ljóðið Móðurást eftir Jónas Hallgrímsson en um leið rúlluðu
myndir á skjá þar sem hver nemandi hafði túlkað sitt erindi á myndrænan hátt.
Síðasta atriðið var svo heimsfrumsýningin á kvikmyndinni Eyðimerkurgangan en
myndin fjallaði um ferð Ísraelsmanna yfir eyðimörkina á leið sinni til
fyrirheitna landsins.

Fyrri hluti vikunnar
einkenndist af undirbúningi fyrir Dag íslenskrar tungu en svo unnum við
hefðbundin verkefni í hinu og þessu eins og vanalega. Þau verkefni falla alveg
í skuggann þessa vikuna enda miðvikudaguinn hápunkturinn.

Myndin hér til hliðar er af vinaverkefni sem 5. bekkur vann í síðustu viku.

Nú standa yfir annaskil
og nemendur skipta um verkgreinar. Námsmatið fer svo heim í lok næstu viku en
þá fá allir nýja námsmatsmöppu.

 Góða helgi.

Guðbjörg Viðarsd.,umsjónarkennari