6. bekkur

Þá er nýtt á byrjað og heldur byrjaði það brösuglega hér í skólanum.  Veðrið og færð hafa verið að stríða okkur en vonandi er það nú að mestu leyti búið.

Nemendur hafa tekið próf í íslensku og stærðfræði.  Nemendur fá stærðfræðiprófin sín til baka í byrjun næstu viku en við höfum verið að fara saman yfir íslenskuprófið. 

Á þessari önn ætlum við að leggja áherslu á læsi og hvernig við vinnum með texta.  Við erum byrjuð í þessari vinnu og þetta fer vel af stað.  Það virðist loða við íslenska nemendur að þeir eigi erfitt með að leita að upplýsingum í texta, vinna úr honum og með hann en þetta ætlum við að laga ..  

Ný lota byrjaði í stærðfræðinni þar sem við leggjum áherslu á mælingar og aðgerðir. 

Vísindavakan gekk vel í náttúrufræðinni og allir búnir að sýna tilraunir.  Við byrjum í eðlisfræði í næstu viku og þá vinnum við með bylgjur og hljóð.

Takk fyrir vikuna og góða helgi.

Frábær jólavefur….

Í síðustu viku byrjuðum við á því að skreyta kennslustofuna okkar og eyddum í það tveimur fyrstu kennslustundunum mánudag og þriðjudag.  Svo á fimmtudag notuðum við snjóinn og góða veðrið og drifum okkur út að renna.  Margir mættu með sínar eigin snjóþotur eða snjóbretti og skemmtu sér allir hið besta, ekki síst kennarinn.

Við lærðum nú samt heilmikið, við erum að klára fyrra heftið í íslenskunni, þ.e. Vanda málið og hefur það gengið að mestu mjög vel.  Við vinnum samt sem áður í aukaverkefnaheftum þar sem áherslan er á málfræði.

Í stærðfræði erum við að vinna í lotunni þar sem tugabrot, almenn brot og prósentur er helst áhersluefnið, en þó fá nemendur alltaf upprifjun á öllu efni sem búið er að læra í skiladæmum.  Skiladæmin hafa skilað sér nánast 100% í vetur og er ég afar stolt af krökkunum hvað þeir eru duglegir og samviskusamir hvað það varðar.

Við erum byrjuð að skrifa ritgerð þar sem efnið er tengt jarðeðlisfræði.  Við vinnum þetta að mestu hér í skólanum þar sem við notum UT, íslenskutíma og náttúrufræðitíma til að vinna.  Allir eru búnir að gera hugtakakortin sín svo nú er bara að byrja að skrifa.

Í náttúrufræðinni er áherslan búin að vera á jörðina en nú erum við farin aðeins út í geiminn…   gaman gaman.

Dagur íslenskrar tungu var síðastliðinn miðvikudag.  Við í 6. bekk sýndum myndir af menningarferðinni okkar til Reykjvavíkur sem við fórum í október síðastliðnum.  Allir stóðu sig afskaplega vel.

Í íslensku unnum við í Mál í mótun og verkefni í Vanda málið.  Nemendur gerðu einnig bókmenntaauglýsingar og leituðu sér upplýsingar um bækur í tölvuveri.  Nemendur fengu íslenskukannanir til baka í dag ásamt markmiðsblaði.

Það var lotupróf í hornum og hyrningum síðastliðin miðvikudag.  Krökkunum gekk vel og skiluðu lotunni með sóma.  Einkunn og markmiðsblað fór heim inni í lotumöppunni í gær. 

Ný önn er nú þegar byrjuð og við erum að ljúka við námsmatið. Námsmatsmöppur fara heim lok næstu viku og áætlanir nýrrar annar fara vonandi að týnast inn í kjölfarið. 

Takk fyrir vikuna og góða helgi.

Enn ein helgin komin nemendum til mikillar gleði….

Við fengum heimsókn síðastliðinn miðvikudag þar sem nemendur frá Danmörku heimsóttu okkur í kennslustofuna.  Það er árlegur viðburður hér í Flúðaskóla að við fáum heimsókn danskra nemenda en hún Anna Ásmunds og nemendur í 10. bekk eru í samstarfi við þá. Það var gaman að fá þá, þeir kynntu sig á dönsku og við fórum í orðaleiki saman. GAMAN

Nemendur keppast við að klára lotuna í stærðfræði þar sem við lærum um alls kyns horn og hyrninga. Almennt gengur það mjög vel og á miðvikudag í næstu viku er könnun úr lotunni. 

Í íslenskunni héldum við áfram í námsefninu Vanda málið og allir nemendur eru á áætlun þar.  Við rifjuðum einnig upp málfræðina og nemendur fengu blöð til þess. 

Í náttúrufræði lærum við um krafta, þ.e. flugkrafta og flotkrafta.  Við klárum það námsefni í næstu viku og á þriðjudag er könnun úr efninu. 

Takk fyrir vikuna og góða helgi.

Það er búið að vera nóg að snúast í náminu þessa vikuna.

Í íslensku unnum við í vinnubókina Vanda málið og nemendur skiluðu verkefni úr lesbók.  Lesverkefnin sem nemendur vinna heima og skila er þeim til mikils sóma og gaman að fara yfir þau.  Í dag byrjuðum við á veggmyndum þar sem við túlkum málshætti með myndum. Þær veggmyndir prýða svo gangana í skólanum á degi íslenskrar tungu þann 16. nóvember.

Í stærðfræði byrjuðum við í nýrri lotu og áherslan er á horn, hornasummur og læra á gráðuboga  en það hefur gengið mjög vel.  Nemendur skiluðu skiladæmum í dag og fengu ný þar sem áherslan er á aðgerðir, flatarmál þríhyrninga og ferhyrninga og svo horn, hornasummur. 

Í náttúrufræðinni erum við að læra um þyngd, togkraft/þyngdarkraft, bárum saman togkraft á Tunglinu, Jörðinni og Júpíter.  Við veltum líka fyrir okkur fallandi hlutum

Takk fyrir vikuna og góða helgi.

Vikan er búin að fljót að líða enda mikið að gera.

Sunneva Sól sýndi okkur afrakstur sinn frá Vestmannaeyjum þar sem hún hafði unnið ýmiss verkefni sem tengdust nýsköpun – flott hjá henni  

Í íslensku unnum við í vinnubókinni Vanda málið, með sagnorð, texta og svo skrifuðum við frétt um jarðskjálftann í Tyrklandi.  Nemendur skiluðu verkefni síðastliðinn þriðjudag um drenginn sem sagði alltaf satt og verkefnin voru í öllum tilvikum afar vel unnin. – Flott hjá þeim.

Í stærðfræði kláruðum við lotuna þar sem áherslan var aðgerðir og var könnun úr efninu síðastliðinn miðvikudag – einkunnir eru komnat i mentor.  Við höfum svo unnið í Stjörnubókum.  Í næstu viku byrjum við í nýrri lotu og þar er áherslan á horn og hyrninga. 

Í náttúrufræði héldum við áfram með efnafræðina og við gerðum tilraunir með suðumark og æfðum okkur að nota metrakerfið.

Takk fyrir vikuna og góða helgi.

Vikan er búin að vera viðburðarík og skemmtileg.

Á mánudag var ekki kennsla þar sem foreldrar heimsóttu umsjónarkennara ásamt nemendum.

Á miðvikudag fórum við í menningarferð til Reykjavíkur.  Við fórum úr rútunni fyrir utan Menntaskólann í Reykjavík og borðuðum þar nestið okkar.  Næst fórum við og kíktum á Alþingishúsið og þaðan í Ráðhús Reykjavíkur þar sem við skoðuðum stórt líkan af Íslandi.  Þá var komið að því að fara í Þjóðmenningarhúsið þar sem við skoðuðum fornbókmenntir okkar Íslendinga og nemendur skrifuðu með fjaðurstaf á leður (eins og gert var í gamla daga).  Nemendur fá svo leðrið sitt sent í pósti í næstu viku.  Áður en við svo fórum heim fórum við í Egilshöllina á skauta.  Þar var rosalega gaman og allir skemmtu sér hið besta.

Í íslensku erum við að vinna með sögur og sagnorð.  Við kláruðum áætlunina alveg í tímanum í dag svo þar er enginn heimavinna um helgina.

Í stærðfræði erum við að klára aðgerðarlotuna en við ætlum að skila henni næsta mánudag.  Nemendur hafa stærðfræðitímann á mánudag til þess.  Það eru afar fáir sem eru með möppuna sína í töskunni til að vinna heima en þeir sem eru með möppuna kíkja á dæmin sem eftir eru .

Takk fyrir vikuna og góða helgi.

Þá er þessi stutta vika liðin.  Við gerðum nú ýmislegt samt sem áður.

Í íslensku unnu nemendur verkefni 15,16 og 17 í vinnubókinni Vanda málið og við unnum með sögugerð, ártöl, krossgátur og orðskýringar. 

Í stærðfræði unumm við í lotunni og svo í Stjörnubækur.  Okkur gengur ágætlega en ég seinkaði skilum á lotunni um viku þar sem ég geri ráð fyrir að nemendur vinni meira í Stjörnubækur í næstu viku vegna þess að ég verð fjarverandi hluta vikunnar.

Í náttúrufræði lærðum við um húðina og unnum verkefni úr því.  Í verkefnatímanum skoðuðum við lifur og nýru  við mikinn fögnuð nemenda og allir áhugasamir  .

Takk fyrir vikuna og góða helgi.

Vikan er búin að ganga nokkuð vel hjá okkur í námi og leik.

Í íslensku höfum við verið að vinna með nafnorð, fallbeygingar og svo höfum við unnið með texta í nýja námsefninu Vanda málið.  Við notum einnig aukabækurnar Mál í mótun þar sem áherslurnar eru á reglur í stafsetningu.

Í stærðfræði fengu nemendur 3. lotuna en núna er áherslan lögð á aðgerðir.  Ég tók möppur nemenda í dag til að fara yfir en þeir fá þær aftur næsta mánudag og einhverjir þurfa að fara að taka með sér möppurnar heim til að vinna í þar – nánar um það í næstu viku.

Í náttúrufræði erum við að fjalla um meltingu, nýru og lifur.  Við förum vel í mataræði, hollustu og svo voru umræður um átröskunarsjúkdóma.  Síðastliðinn þriðjudag var svö könnun úr efninu.

Í lífsleikni ræddum við tillitsemi og kurteisi, t.d. að tala ekki þegar aðrir tala, halda höndum og fótum fyrir sjálfa sig, taka tillit til þess að við erum ólík með ólík áhugamál o.s.frv.

Takk fyrir vikuna og góða helgi.

Vikan er búin að vera nokkuð hefðbundin en það sem við erum búin að vera að gera er:

Í íslensku unnum við verkefni í stafsetningu og unnum þá með stóran og lítinn staf í upphafi málsgreina og svo í sérnöfnum, við veltum einnig fyrir okkur einkenni lýsingarorða.  Nemendur unnu  lesskilningsverkefni heima og svo var stutt krossapróf þar sem allir stóðu sig afar vel.   Í dag unnu nemendur í ljósriti þar sem aðaláherslan er á málfræði og við rifjuðum upp nafnorð, sérnöfn, samnöfn, eintala og fleirtala.

Í stærðfræði skiluðu nemendur Rúmmfræðilotunni og síðastliðinn miðvikudag var könnun úr efninu.  Flestir er á nokkuð góðu róli og einkunnir eru komnar í mentor.  Í gær fengu nemendur nýja lotu og nú er áherslan á aðgerðir í stærðfræði.  Í dag skiluðu nemendur skiladæmum.

Í náttúrufræði höldum við áfram með mannslíkamann og við lærðum um hjarta og blóð.  Nemendur fengu vinnubækur og unnu heilar sjö blaðsíður í þá bók síðastliðinn þriðjudag – hörku duglegir og jákvæðir krakkar.

Í UT eru nemendur enn að læra á bloggið sitt og eru mjög áhugasamir með að læra betur á það svo ég ætla að gefa þeim aðeins meiri tíma að læra að setja inn t.d. myndir og svo krækjur og áhugaverðar vefsíður.

Í lífsleikni fórum við út.  Mér finnst það mikilvægt að nota góða veðrið og að bekkurinn leiki sér saman í leikjum á meðan veður leyfir. 

Takk fyrir vikuna og góða helgi.